We
Noseland entstande esch
Det
wo höt Noseland esch, esch vor ned langer Zit no normaui Wäut gsi, aso met
andere Wort döschters Metuauter, e hemutruurigi Sach.
D’Bou-Gschäft
händ dervo tröimt, di letschti Wese z’verboue, äntwäder e risigs Hochhus oder e
achtspurigi Outobahn, dronder louft nüt. D’Arbeitgäber händ de Arbeiter de Lohn
dröckt, wos händ chönne ond händ glichzitig sech säuber die no grössere Boni
uszaut. S’het ganz vöu Lüt gä, wo
ned gnue z’Ässe gha händ ond vöui Chend händ kes Dach öberem Chopf gha.
Niemer
het sech trout öppis z’säge, wöu jede gnau gwösst het, dass är sösch si Job
verlürt, shet jo gnue gha, wo arbetslos gsi send ond de Job gärn gmacht hätte.
Ond wemmer i dere Wäut ke Job me gha het, de esch mer niemer me gsi. D’Lüt händ
agfange d’Ouge zuztue, Grend abe ond schaffe, händ velech hi ond do no d’Fuscht
im Sack gmacht ond sösch händs of zobe gwartet, om sech vor de Färnseh zlegge
oder of die nöchschte Ferie, wo si eri grossi Freiheit amene Strand wit ewäg
verschlofe händ. Met der Zit händs ned emou me tröimt oder höschtens no vom
nöischte I-Phone oder ergend emene App, wo eh niemer wörkli brucht het. Di
meischt Ufregig hets no gä, wenn si of dr Outobahn im Stou gschtande send, oder
wenn d’Nationaumannschaft weder emou e Seich zämetschuttet het.
Di
meischte händ aber gar ned gmerkt, dass es ene so ned rechtig wou esch, si händ
jo gar ke Zit gha, s’zmerke, si send jo emmer vou im Stress gsi, wöu ou ir
Freizit het mer sech ständig müesse bewise, dass mer der Gröscht, de Schönscht
ond de Bescht esch. Ond de het emmer jede s’Gfüeu gha, är müessi Party mache
ond sech oms verrecke vergnüege bes zom äne use. Dass glichzitig ganz vöu Lüt
musarm gsi ond verhongeret send, het mer ned dörfe zuegä, oder de het mer haut
ir Chele es Zwänzgi abeglo oder ir Terre des Hommes öppis gspändet zom
s’schlächte Gwösse z’beruhige.
Ond
d’Chend, die händ gar nüt anders kennt. Die händ gmeint, es seg normau, dass
d’Wäut imene Monitor ene stecki ond dass mer aues met emene Joystick chönni
mache, die händ jo nömme dosse dörfe go spele, ond wenns no dörfe hätte, so hets
scho lang ke Plätz me gäh, wos de wörkli Spass gmacht hät.
Aber
de König vo Noseland, de het sech no möge a sini Chendheit erennere, dass är
emmer am Bach onde omegsecklet esch ond im Waud het chönne go Waudhöttene boue.
Ond är het sech ou möge erennere, dass är glert het, dass mer niemer set lo
verhongere.
Woner
de sis Land g’erbt het, het är fasch echli es schlächts Gwösse becho, dass jetz
das em elei söu si. Ond de het är sech gseit, är düei jetz Noseland grönde, ond
de het är sim Boumeneschter gseit, dass ab sofort nüt me boue wird, ond är het
gseit, dass d’Arbetgäber of Noseland ke schlächbezauhti Arbet me dörfe abüte.
Ond är het igfüehrt, dass wemmer of Noseland chonnt, dass mer de gratis öppis
z’ässe bechonnt. Ond är het de Lüt gseit, sie söue weder echli tröime!
Ond
scho gli het är ganz vöu Meneschter gha, wo ghoufe händ, das Land z’regiere.
Ond schinbar machesis guet, oder het öpper do enne mou ghört oder gläse, dass
of Noseland armi Lüt gäb, dass es es ongrächt regierts Land seg, dass Noseland
es Schoudeproblem heig oder sösch ergend en Skandal.
Aso
mer esch ämu nüt bekannt. Im Gägeteiu, s’get emmer meh Lüt, wo wänd Noseländer
wärde!
Keine Kommentare:
Kommentar veröffentlichen